Premtimin e Partisë Demokratike të Kosovës për rritjen e pagave 100 për qind nëse i fiton zgjedhjet e 9 shkurtit, Lëvizja Vetëvendosje e ka quajtur si një premtim që nuk është i ri.

Në reagimin e LVV-së kundrejt këtij premtimi, thuhet se derisa kjo parti ishte në pushtet për veten, prokurorinë dhe gjyqësorin i kanë rritur pagat 100 për qind, kurse për shërbyesit civil vetëm 4 për qind, përcjell Arbresh.info.

“Klubi i Stërvjetruar Politik flet sërish për rritje të pagave. Por, kjo nuk është diçka e re nga ta. Por çfarë bënë ata sa ishin në pushtet? Për veten, prokurorinë dhe gjyqësorin rritën pagat për 100%, sepse aty kishin interes. Ndërkohë, shërbyesve civil, për të cilët gjithmonë premtonin, u rritën pagat vetëm 4%”, thuhet në reagimin e LVV-së.

“Në dallim nga ta, Qeveria Kurti nuk premtoi rritje të pagave, por i realizoi ato, duke krijuar një kornizë ligjore për paga, koeficientë për secilin pozicion, dhe duke zvogëluar hendekun mes pagës më të lartë dhe asaj më të ulët. Rritja e pagave tani lidhet me zhvillimin ekonomik të vendit: sa më shumë të rritet ekonomia, aq më shumë rriten pagat”, thuhet tutje në reagim.

“Gjithashtu, Qeveria u kujdes që të gjitha kategoritë të përfitojnë, veçanërisht mësuesit, policët, infermierët, zjarrfikësit, ushtarët dhe pensionistët. Krahas kësaj, u implementua një program i gjerë social që përfshin rritje të pensioneve, shtesa për nënat leona, për fëmijë dhe forma të tjera subvencionesh që ndikojnë pozitivisht në mirëqenien e qytetarëve të Republikës së Kosovës”, thuhet në reagimin e partisë në pushtet, Lëvizja Vetëvendosje./Arbresh.info